چھٹے غبار نظر بام طور آ جائے

چھٹے غبار نظر بام طور آ جائے
پیو شراب کہ چہرے پہ نور آ جائے

اٹھاؤ جام بنام حیات بادہ کشو
نظارے جھومیں نظر کو سرور آ جائے

شراب خانے میں کوثر کا ذکر کیا کہئے
کسی کی عقل میں جیسے فتور آ جائے

مقام دار سے گزرو تو زندگی پاؤ
پیو جو زہر ہلاہل سرور آ جائے

نگاہ تیز نفس گرم آرزو بیباک
جسے ہو ناز ہمارے حضور آ جائے

یہ کاروبار مشیت بھی خوب ہے تاباںؔ
کسی پہ برق گرے زد پہ طور آ جائے