chashm-o-gosh pe pahre hain
andhe hain sab bahre hain
dukh ki aankhen nili hain
dukh ke baal sunahre hain
naqsh abhi hai KHal tera
rang bhi tere gahre hain
mera koi nam nahin
jaane kitne chehre hain
mani par koi qaid nahin
lafzon par kyun pahre hain
dhyan ke ras mein Dube lab
bosa bosa chehre hain
ashkon ki barish hogi
dukh ke baadal gahre hain
ghar ka rasta bhule 'mushaf'
ek hotel mein Thahre hain
Ghazal
Chashm-o-gosh pe pahre hain
Mushaf Iqbal Tausifi