چمن میں لالہ و گل پر نکھار بھی تو نہیں

چمن میں لالہ و گل پر نکھار بھی تو نہیں
خزاں اگر یہ نہیں ہے بہار بھی تو نہیں

تمازت غم دوراں سے پھنک رہی ہے حیات
کہیں پہ سایۂ گیسوئے یار بھی تو نہیں

خیال ترک محبت بجا سہی لیکن
اب اپنے دل پہ ہمیں اختیار بھی تو نہیں

کبھی تو جان وفا ہے کبھی ہے دشمن جاں
تری نظر کا کوئی اعتبار بھی تو نہیں

بایں تغافل پیہم ستم تو یہ ہے سرورؔ
میں اس کی خاطر نازک پہ بار بھی تو نہیں