بھولا ہے بعد مرگ مجھے دوست یاں تلک

بھولا ہے بعد مرگ مجھے دوست یاں تلک
سگ بھی نہ اس کا آیا مری استخواں تلک

گو ہم قفس سے جا نہ سکے بوستاں تلک
اڑ اڑ کے رنگ چہرہ گیا پر وہاں تلک

بلبل ہجوم گل ہے چمن میں یہاں تلک
پھولوں سے چھا گیا ہے ترا آشیاں تلک

کب پہنچی آہ ضعف سے گوش بتاں تلک
سو جا ٹھہر کے سینے سے آئی زباں تلک

پرواز پیش ازیں تھی مری آسماں تلک
اب تو چمن سے جا نہ سکوں آشیاں تلک

ایسا کیا ضعیف غم انتظار نے
آنکھوں کو میری بار ہے خواب گراں تلک

عالم ہوں علم عشق کا میں کر نہ ہم سری
اے عندلیب تو ہے پڑی بوستاں تلک

اس مہ کے وصف سے یہ ہوا مرتبہ بلند
پہنچی مری غزل کی زمیں آسماں تلک

پاس ادب رہا ہے جنوں میں بھی اس قدر
آتا ہوں سجدے کرتا ترے آستاں تلک

اس مست کے ہیں گیسوؤں کے سلسلے میں ہم
ساقی مرید جس کا ہے پیر مغاں تلک

رکھیں ادب سے پاؤں نہ ہم تیری راہ میں
باہر جب آپ سے ہوں تو پہنچیں وہاں تلک

فصل خزاں میں گل کا تو آنا محال ہے
بجلی ہی کاش آئے مری آشیاں تلک

کیوں کر نہ سر پھرے مرا اس تیغ کے لیے
گردش سی جستجو میں ہے مرگ نشاں تلک

سو بار اپنی فکر عدم سے پرے گئی
لیکن نہ پہنچی یار کے موئے بیاں تلک

اس حور کا مکان ہے جنت سے بھی پرے
رضواں پہنچ سکے نہ کبھی پاسباں تلک

اس درجہ فرط ضعف سے ہم پیچھے رہ گئے
پہنچی نہ آہ بھی جرس کارواں تلک

دل میں ہمارے اس کی محبت نے گھر کیا
پہنچا ہے اس مکان سے جو لا مکاں تلک

اللہ رے دماغ ذرا دیکھ اے ہما
آیا نہ بے طلب سگ یار استخواں تلک

اس ماہ نے جو سر مرا ٹھکرایا پاؤں سے
پہنچا دماغ آج مرا آسماں تلک

نخل مراد یار ہوا آج بارور
صد شکر کٹ کے سر مرا پہنچا سناں تلک

پھر جائے تیر آ کے وہ برگشتہ بخت ہوں
رخ پھیرے دیکھ کر مجھے اس کی کماں تلک

مرنے کے بعد ہے سگ جاناں کا انتظار
کہہ دو ہما نہ آئے مری استخواں تلک

سو بار آ کے موت بھی فرقت میں پھر گئے
برگشتگی نصیب کی کہیے کہاں تلک

گویاؔ یہ ناتوانی کا احسان مجھ پہ ہے
آنے دیا نہ یار کا شکوہ زباں تلک