بیاباں زاد کوئی کیا کہے خود بے مکاں ہے

بیاباں زاد کوئی کیا کہے خود بے مکاں ہے
سمندر اے سمندر تیرا اپنا گھر کہاں ہے

وفا کا عہد کیا باندھوں ابھی اے دست خوشبو
ابھی بادل حنا پا ہے ابھی سورج جواں ہے

عجب افسوں صفت سارا نہ چھپ کر ہے نہ ظاہر
جزیرہ ایسا سویا ہے وہ دریا سا رواں ہے

ہوا ہے منحرف خود اپنی ہی تحریر سے کیوں
حقیقت کیا یہی ہے وہ بھی بالکل بے اماں ہے

سوال ایسا کہ اس کا لب ہلانا بھی تھا مشکل
یہ پوچھا تھا کہ خوشبو بستہ ہے یا رواں ہے

کوئی تو ہم سخن ہوتا کہ اس سے بات کرتے
بتاتے کھل کے وہ کیا لفظ ہے جو بے بیاں ہے

مرے پاس آ کبھی اے لمحۂ حرف مسرت
کہ میں بھی دیکھ لوں آخر تو کتنا خوش زباں ہے

ہوا کا ہاتھ کیا آتش بدن ہے جو صف گل
ہو موسم کوئی بھی یہ تو وہی شعلہ بجاں ہے

جو سب کچھ دیکھ کر بھی دیکھنے دیتا نہیں کچھ
کہوں منظورؔ کیا آنکھوں میں یہ کیسا دھواں ہے