برسوں تری طلب میں سفینہ رواں رہا

برسوں تری طلب میں سفینہ رواں رہا
اے میرے مہربان بھنور تو کہاں رہا

ان سے ملی نظر تو پلٹ کر نہ آ سکی
وہ رشتۂ نگاہ بھی کب درمیاں رہا

کب عمر خضر خندۂ گل کا جواب ہے
یاں دو گھڑی میں عمر ابد کا سماں رہا

میں بھی ترے بغیر نہ آرام پا سکا
تو بھی مری تلاش میں بے خانماں رہا

مجھ کو گلہ ہے طبع مروت شعار سے
ساغر بدست ہو کے بھی تشنہ وہاں رہا

اے دور چرخ اب کوئی تدبیر اور کر
تیری ستم گری پہ تو میں شادماں رہا

مجھ کو جلیلؔ کون کہے گا شکستہ دل
کھایا تھا ایک زخم سو وہ بے نشاں رہا