بخشے پھر اس نگاہ نے ارماں نئے نئے

بخشے پھر اس نگاہ نے ارماں نئے نئے
محسوس ہو رہے ہیں دل و جاں نئے نئے

یوں قید زندگی نے رکھا مضطرب ہمیں
جیسے ہوئے ہوں داخل زنداں نئے نئے

کس کس سے اس امانت دیں کو بچایئے
ملتے ہیں روز دشمن ایماں نئے نئے

راحت کی جستجو میں خوشی کی تلاش میں
غم پالتی ہے عمر گریزاں نئے نئے

مسجد میں اور ذکر بتوں کا جناب شیخ
شاید ہوئے ہیں آپ مسلماں نئے نئے

دم بھر دم اجل کو نہ حاصل ہوا فراغ
ہوتے رہے چراغ فروزاں نئے نئے

خانہ خراب ہم سے جہاں میں کہاں ادیبؔ
آباد کر رہے ہیں بیاباں نئے نئے