BaDa aazar-e-jaan hai wo agarche mehrban hai wo

baDa aazar-e-jaan hai wo agarche mehrban hai wo
agarche mehrban hai wo baDa aazar-e-jaan hai wo

misal-e-asman hai wo mujhe zarKHez karta hai
mujhe zarKHez karta hai misal-e-asman hai wo

karim-o-saeban hai wo mujhe mahfuz rakhta hai
mujhe mahfuz rakhta hai karim-o-saeban hai wo

agarche be-makan hai wo panahen mujh ko deta hai
panahen mujh ko deta hai agarche be-makan hai wo

baDa aaram-e-jaan hai wo liye phirta hai sine mein
liye phirta hai sine mein baDa aaram-e-jaan hai wo

agarche be-zaban hai wo nazar se baat karta hai
nazar se baat karta hai agarche be-zaban hai wo

ek aisa zahr-e-jaan hai wo main jis ko pi ke zinda hun
main jis ko pi ke zinda hun ek aisa zahr-e-jaan hai wo

ki bahr-e-be-karan hai wo tabhi sahil nahin milta
tabhi sahil nahin milta ki bahr-e-be-karan hai wo

mizaj-e-dushmanan hai wo paraya bhi hai apna bhi
paraya bhi hai apna bhi mizaj-e-dushmanan hai wo

kamal-e-dostan hai wo wahi awwal wahi aaKHir
wahi awwal wahi aaKHir kamal-e-dostan hai wo

amir-e-karwan hai wo main us ki rah chalta hun
main us ki rah chalta hun amir-e-karwan hai wo

baDa gauhar-fishan hai wo mujhe bhi kuchh guhar dega
mujhe bhi kuchh guhar dega baDa gauhar-fishan hai wo

sunahri kahkashan hai wo dahakte hain kai suraj
dahakte hain kai suraj sunahri kahkashan hai wo

suna hai mehrban hai wo 'anis' itraate phirte hain
'anis' itraate phirte hain suna hai mehrban hai wo