بار خاطر باغباں کا نے دل آزار چمن

بار خاطر باغباں کا نے دل آزار چمن
سب سے رہتا ہوں الگ جوں خار دیوار چمن

نے دھواں دل سے اٹھے یارو نہ پروانہ جلے
آتش خاموش ہوں مانند گلزار چمن

صرف آرائش کو ہوں گلہائے کاغذ کی مثال
بو کرے مجھ کو نہ کوئی اور نہ درکار چمن

بلبل رشتہ بپا لٹکے ہے شاخ گل سے آج
سخت الجھیڑے میں ہے یارب گنہ گار چمن

کیا ہوئے میں کس سے پوچھوں حال ان کا اے نثارؔ
اب نظر آتے نہیں وہ ناز بردار چمن