Baad muddat ke mere aankh se aansu nikle

baad muddat ke mere aankh se aansu nikle
KHushk sahra mein jo pani gire KHushbu nikle

ashk sukhe hue galon pe kaji se nikle
raqs karte hue sahraon mein aahu nikle

tere diwane ke diwanon ke diwane hain
teri kya baat karen baaton se KHushbu nikle

tere maiKHane mein jo aaj uchhaala saghar
ek qatre ke mere saikDon pahlu nikle

saqiya tu ne jo kal di thi mujhe kam di thi
aaj nikle to faqat le ke taraazu nikle

nind se chur zamane ki daraKHshan ho hayat
ghar se angDaiyan leta hua gar tu nikle