ba-waqt-e-sham umidon ka Dhal gaya suraj
had-e-nigah se aage nikal gaya suraj
ye sharq-o-gharb hamari nazar ke hain aafaq
nazar jo badli to kitna badal gaya suraj
ThiThurti raat ke pahlu mein aa ke baiTha tha
mere nafas se mila aur jal gaya suraj
ajib karb hai dil ke har ek goshe mein
mere wajud mein goya pighal gaya suraj
hawas ke shauq mein utra tamazaten le kar
zamin ki god mein shoale ugal gaya suraj
Ghazal
Ba-waqt-e-sham umidon ka Dhal gaya suraj
Qamar Abbas Qamar