عذاب ٹوٹے دلوں کو ہر اک نفس گزرا

عذاب ٹوٹے دلوں کو ہر اک نفس گزرا
شکستہ پا تھے گراں مژدۂ جرس گزرا

ہجوم جلوہ و نیرنگیٔ تمنا سے
تمام موسم گل موسم ہوس گزرا

عجب نہیں کہ حیات دوام بھی بخشے
وہ ایک لمحۂ فرقت جو اک برس گزرا

یہ مصلحت کہ کہیں دہر ہے کہیں فردوس
وہی جو عالم دل ہم پہ ہم نفس گزرا

غم مآل رہا عرض شوق سے پہلے
اس ایک بات پہ کیا کیا نہ پیش و پس گزرا

کشاکش غم آزادیٔ و اسیری میں
ہر آشیاں پہ کوئی عالم قفس گزرا

رہ طلب میں ہیں در ماندہ راہبر تابشؔ
یہی ہے حال تو یہ قافلہ بھی بس گزرا