Auron ka tha bayan to mauj sada rahe

auron ka tha bayan to mauj sada rahe
KHud umr bhar asir-e-lab-e-muddaa rahe

misl-e-habab bahr-e-gham-e-hadsat mein
hum zer-e-bar-e-minnat-e-ab-o-hawa rahe

hum us se apni baat ka mangen agar jawab
lahron ka pech-o-KHam wo khaDa dekhta rahe

aaya to apni aankh bhi apni na ban saki
hum sochte the us se kabhi samna rahe

gulshan mein the to raunaq-e-rang-e-chaman bane
jangal mein hum amanat-e-baad-e-saba rahe

surKHi bane to KHun-e-shahidan ka rang the
raushan hue to mashal-e-rah-e-baqa rahe

'amjad' dar-e-nigar pe dastak hi dijiye
is be-karan sukut mein kuchh ghalghala rahe