apni wahshat pe ro raha hun main
kis parinde ka ghonsla hun main
teri binai DhunDhti hai mujhe
teri aankhon ka masala hun main
muKHtalif git mujh se marwi hain
muKHtalif KHwab dekhta hun main
tere lafzon mein nur bharta hun
teri aawaz ka diya hun main
kal main bedar KHwab-gah mein tha
aaj chaukhaT pe jagta hun main
teri manzil agar mohabbat hai
tere raste ka rasta hun main
jab ghuTan par na bas chale 'arish'
apni aankhon se phuTta hun main
Ghazal
Apni wahshat pe ro raha hun main
Sarfraz Arish