apni jannat mujhe dikhla na saka tu waiz
kucha-e-yar mein chal dekh le jannat meri
sari duniya se anokhi hai zamane se juda
nemat-e-KHas hai allah re qismat meri
shikwa-e-hijr pe sar kaT ke farmate hain
phir karoge kabhi is munh se shikayat meri
teri qudrat ka nazara hai mera ijz gunah
teri rahmat ka ishaara hai nidamat meri
lo tabassum bhi sharik-e-nigah-e-naz hua
aaj kuchh aur baDha di gai qimat meri
faiz yak lamha-e-didar salamat 'fani'
gham ki har roz hai baDhti hui daulat meri
Ghazal
Apni jannat mujhe dikhla na saka tu waiz
Fani Badayuni