apni aankhon ko aqidat se laga ke rakh li
teri dahliz ki miTTi thi uTha ke rakh li
tujh ko takte hi rahe raat bahut der talak
chand ke taq mein taswir saja ke rakh li
dil si nau-KHez kali teri mohabbat ke liye
sinch ke jazbon se pahlu mein khila ke rakh li
is nae sal ke swagat ke liye pahle se
hum ne poshak udasi ki sila ke rakh li
dam ulajhta tha shab-e-tira ka tariki se
is liye chand ki qindil jala ke rakh li
Ghazal
Apni aankhon ko aqidat se laga ke rakh li
Sidra Sahar Imran