apne KHwabon ko ek din sajate hue
gir paDe chand taron ko late hue
ek pul par khaDa sham ka aaftab
sab ko takta hai bas aate jate hue
ek patthar mere sar pe aa kar laga
kuchh phalon ko shajar se giraate hue
ai ghazal teri mahfil mein pai jagah
ek ghalicha bichhate uThate hue
subh ek git kanon mein kya paD gaya
kaT gaya din wahi gungunate hue
zat se apni 'atish' tha ghafil bahut
jal gaya KHud diya ek jalate hue
Ghazal
Apne KHwabon ko ek din sajate hue
Swapnil Tiwari