انجم و مہر و گل و برگ و صبا کچھ بھی نہیں

انجم و مہر و گل و برگ و صبا کچھ بھی نہیں
خوب دیکھا بخدا غیر خدا کچھ بھی نہیں

وحشت و مستی و حیرت کے سوا کچھ بھی نہیں
ہے جسے اس کا پتہ اپنا پتہ کچھ بھی نہیں

ہستئ عالم ہشیار ہو کہ ہو اپنا وجود
سب کچھ اک وہم مسلسل کے سوا کچھ بھی نہیں

عشق تو زندۂ جاوید بنا دیتا ہے
عشق کے باب میں مفہوم فنا کچھ بھی نہیں

کب سے ہے کون ہے کیوں ہے وہ کہاں ہے کیا ہے
ذات بے چوں میں یہ سب چون و چرا کچھ بھی نہیں

اور سب کچھ ہو زمانے کو مبارک اے دلؔ
یاں تو دامن میں محمد کے سوا کچھ بھی نہیں