Ai ham-nafaso dard ki ye raat kaDi hai

ai ham-nafaso dard ki ye raat kaDi hai
sar thame hue dil mein kahin aas khaDi hai

ham-rang-e-shafaq hai dil-e-masum ka aalam
wo daur-e-tamanna ki sahar chup ke khaDi hai

ujli thi teri yaad ki ye zard si patti
KHakistar-e-ayyam mein KHamosh paDi hai

un aankhon mein phir dekha haya rang-e-tabassum
raste mein qaza se meri phir aankh laDi hai

phir dast-e-saba ne wo gajar aaj bajaya
palkon pe phir ek bar meri nind uDi hai

phir shahr-e-ghazalan mein ghazal laya hai 'qaisar'
surat-kada-e-husn mein phir dhum paDi hai