ابر اترا ہے چار سو دیکھو
اب وہ نکھرے گا خوب رو دیکھو
سرخ اینٹوں پہ ناچتی بارش
اور یادیں ہیں رو بہ رو دیکھو
ایسے موسم میں بھیگتے رہنا
ایک شاعر کی آرزو دیکھو
وہ جو زینہ بہ زینہ اترا ہے
عکس میرا ہے ہو بہو دیکھو
اپنی سوچیں سفر میں رہتی ہیں
اس کو پانے کی جستجو دیکھو
دل کی دنیا ہے دوسری دنیا
ایسے منظر کو با وضو دیکھو
اک سکوں ہے اگرچہ بستی میں
سعدؔ اندر کی ہاؤ ہو دیکھو
غزل
ابر اترا ہے چار سو دیکھو
سعد اللہ شاہ