ابر صحرائے جاں تلاش کرے

ابر صحرائے جاں تلاش کرے
پیاس اپنا جہاں تلاش کرے

ہر عقیدت کی ایک منزل ہے
ہر جبیں آستاں تلاش کرے

اپنے محور پہ رہ نہیں سکتی
جو زمیں آسماں تلاش کرے

عشق ڈھونڈے کہانیاں اپنی
حسن اپنا بیاں تلاش کرے

کوئی تو راستوں پہ نکلے بھی
کوئی تو کارواں تلاش کرے

کیا حقیقت پہ چل گیا افسوں
کیا یقیں بھی گماں تلاش کرے

کیا ستاروں سے جا ملیں آنکھیں
کیا نظر کہکشاں تلاش کرے

کس کو کردار کی تمنا ہے
کون اب داستاں تلاش کرے

جاؤ کہہ دو نثارؔ جا کے اسے
ہم سا اک مہرباں تلاش کرے