abr ke sath hawa raqs mein hai
sare jangal ki faza raqs mein hai
panw Tikte hi nahin ashkon ke
jaise aankhon ki dua raqs mein hai
darmiyan chiKHte nishanon ke
mera KHamosh KHuda raqs mein hai
khokhla peD khaDa hai lekin
us ka ehsas ana raqs mein hai
ab to un pairon ko ghairat aae
wo mera shoala-nawa raqs mein hai
ishq-e-pechan jo sutunon pe chaDhi
ghar ki viran faza raqs mein hai
KHushbuen gunj rahi hain mujh mein
aaj phulon ki sada raqs mein hai
sab lakiron se lahu rista hai
yun hatheli pe hina raqs mein hai
nazar sailab hue ahl-e-makan
taq par ab bhi diya raqs mein hai
Ghazal
Abr ke sath hawa raqs mein hai
Ishrat Afreen