Abhi to aur bhi din barishon ke aane the

abhi to aur bhi din barishon ke aane the
karishme sare use aaj hi dikhane the

hiqaraten hi milin hum ko zang-aluda
dilon mein yun to kai qism ke KHazane the

ye dasht tel ka pyasa na tha KHuda-wanda
yahan to chaar chhe dariya hamein bahane the

kisi se koi talluq raha na ho jaise
kuchh is tarah se guzarte hue zamane the

parinde dur fazaon mein kho gae 'alwi'
ujaD ujaD daraKHton pe aashiyane the