آشنائی ہی سہی اپنی طلب کوئی تو ہو

آشنائی ہی سہی اپنی طلب کوئی تو ہو
اس دیار غیر میں بھی ہم نسب کوئی تو ہو

شور گھر تک آ گیا ہے کوچہ و بازار کا
کچھ تو ایسا ہو یہاں پہ مہر لب کوئی تو ہو

کرب تنہائی لیے آخر کہاں تک جائیے
حادثہ ہی ہو اگرچہ بے سبب کوئی تو ہو

ساز کے ٹوٹے ہوئے تاروں کو پھر سے جوڑئیے
نغمۂ خوش رنگ یا سوز طرب کوئی تو ہو

شاخ سے ٹوٹے ہوئے پتے بہت مایوس ہیں
ایک چنگاری سہی ان کا بھی اب کوئی تو ہو