aarzuon ka nagar chhoD aae
naz tha jis pe wo ghar chhoD aae
ek teri yaad bacha kar rakh li
sara saman-e-safar chhoD aae
muddaton yaad rakhegi duniya
hum bhi ek aisa hunar chhoD aae
ghar ke bahar bhi udasi na gai
ghar se ghabra ke jo ghar chhoD aae
thak gae jab koi khiDki na khuli
hum wahin dida-e-tar chhoD aae
us ko aate hi banegi 'rahmat'
aaj ek aisi KHabar chhoD aae
Ghazal
Aarzuon ka nagar chhoD aae
Rahmat Amrohvi