آنکھوں کو اشک بار کیا ہے کبھی کبھی

آنکھوں کو اشک بار کیا ہے کبھی کبھی
یوں تیرا انتظار کیا ہے کبھی کبھی

محشر کو درکنار کیا ہے کبھی کبھی
تجھ پر جو اعتبار کیا ہے کبھی کبھی

خون جگر سے ہم نے گلوں کو نکھار کر
گلشن کو پر بہار کیا ہے کبھی کبھی

اس آستانہ ناز سے نفرت بھی کی مگر
سجدہ بھی بار بار کیا ہے کبھی کبھی

ہم نے تمہاری یاد کے داغوں سے بھر کے دل
دل گشتۂ بہار کیا ہے کبھی کبھی

ساقی نے دے کے جام کیا ہم کو شادماں
واعظ نے سوگوار کیا ہے کبھی کبھی

مرغوبؔ تیری دی ہوئی دیوانگی کا فیض
ہستی کو تار تار کیا ہے کبھی کبھی