آئنہ توڑ دے رہا کر دے

آئنہ توڑ دے رہا کر دے
بے وفا اک یہی وفا کر دے

رشتۂ درد توڑ دے دل سے
رنگ کو پھول سے جدا کر دے

زندگی بھر تجھی کو چاہا ہے
قرض کچھ تو مرا ادا کر دے

دے رہا ہے زکات حسن اگر
مرے حق سے ذرا بڑھا کر دے

مدتیں ہو گئیں تجھے دیکھے
اب تو ملنے کا سلسلہ کر دے

پھر کوئی گل کھلے سر مژگاں
پھر در خواب کوئی وا کر دے

اک ستارے کو بخش کر مرے خواب
پھر اسے میرا آئنہ کر دے

بیٹھتا جا رہا ہے جاں کا غبار
اب اسے مجھ سے ماورا کر دے

اے فقیر‌ دیار لیلیٔ جاں
مرے حق میں بھی کچھ دعا کر دے