دل مضطر سے نالاں ہیں ادھر وہ بھی ادھر ہم بھی

دل مضطر سے نالاں ہیں ادھر وہ بھی ادھر ہم بھی
محبت میں پریشاں ہیں ادھر وہ بھی ادھر ہم بھی

کسے فرصت ہے ماضی کی پرانی داستاں چھیڑے
غم حاضر میں غلطاں ہیں ادھر وہ بھی ادھر ہم بھی

بظاہر کوئی حیرانی نہیں ترک محبت پر
مگر دل میں پشیماں ہیں ادھر وہ بھی ادھر ہم بھی

خزاں کے جور پیہم کی شکایت ہے تو دونوں کو
طلب گار بہاراں ہیں ادھر وہ بھی ادھر ہم بھی

انہیں جانے کی جلدی ہے ہمیں ضد ہے کہ رک جائیں
غرض دونوں پریشاں ہیں ادھر وہ بھی ادھر ہم بھی