wo jo ek shart thi wahshat ki uTha di gai kya
meri basti kisi sahra mein basa di gai kya

Irfan Siddiqi

---

---

wahshat ka ye aalam ki pas-e-chaak gareban
ranjish hai bahaaron se ulajhte hain KHizan se

Javed Saba

---

---

ek din dukh ki shiddat kam paD jati hai
kaisi bhi ho wahshat kam paD jati hai

Kashif Husain Ghair

---

---

na hum wahshat mein apne ghar se nikle
na sahra apni virani se nikla

Kashif Husain Ghair

---

---

wahshaten kuchh is tarah apna muqaddar ban gain
hum jahan pahunche hamare sath virane gae

Khatir Ghaznavi

---

---

wahshaten ishq aur majburi
kya kisi KHas imtihan mein hun

Khurshid Rabbani

---

---

'shad' itni baDh gai hain mere dil ki wahshaten
ab junun mein dasht aur ghar ek jaise ho gae

Khushbir Singh Shaad

---

---