wo jo ek shart thi wahshat ki uTha di gai kya
meri basti kisi sahra mein basa di gai kya
wahi lahja hai magar yar tere lafzon mein
pahle ek aag si jalti thi bujha di gai kya
jo baDhi thi ki kahin mujh ko baha kar le jae
main yahin hun to wahi mauj baha di gai kya
panw mein KHak ki zanjir bhali lagne lagi
phir meri qaid ki miad baDha di gai kya
der se pahunche hain hum dur se aae hue log
shahr KHamosh hai sab KHak uDa di gai kya
Ghazal
Wo jo ek shart thi wahshat ki uTha di gai kya
Irfan Siddiqi