ada se dekh lo jata rahe gila dil ka
bas ek nigah pe Thahra hai faisla dil ka

Arshad Ali Khan Qalaq

---

---

nigah-e-naz ki masumiyat are tauba
jo hum fareb na khate to aur kya karte

Arshi Bhopali

---

---

nigahen is qadar qatil ki uff uff
adaen is qadar pyari ki tauba

Arzoo Lakhnavi

---

---

pahli nazar bhi aap ki uff kis bala ki thi
hum aaj tak wo choT hain dil par liye hue

Asghar Gondvi

---

---

kuchh tumhaari nigah kafir thi
kuchh mujhe bhi KHarab hona tha

Asrar-ul-Haq Majaz

---

---

us ne meri nigah ke sare suKHan samajh liye
phir bhi meri nigah mein ek sawal hai naya

Athar Nafees

---

---

didar ki talab ke tariqon se be-KHabar
didar ki talab hai to pahle nigah mang

ignorant of mores when seeking visions bright
if you want the vision, you first need the sight

Azad Ansari

---

---