kisi ne mol na puchha dil-e-shikasta ka
koi KHarid ke TuTa piyala kya karta

Haidar Ali Aatish

---

---

ku-e-jaanan mein bhi ab is ka pata milta nahin
dil mera ghabra ke kya jaane kidhar jata raha

Haidar Ali Aatish

---

---

us bala-e-jaan se 'atish' dekhiye kyunkar bane
dil siwa shishe se nazuk dil se nazuk KHu-e-dost

Haidar Ali Aatish

---

---

ye dil lagane mein main ne maza uThaya hai
mila na dost to dushman se ittihad kiya

Haidar Ali Aatish

---

---

dil ko to bahut pahle se dhaDka sa laga tha
pana tera shayad tujhe khone ke liye hai

Haidar Qureshi

---

---

charcha hamara ishq ne kyun ja-ba-ja kiya
dil us ko de diya to bhala kya bura kiya

Hakim Mohammad Ajmal Khan Shaida

---

---

dil ko jaanan se 'hasan' samjha-bujha ke lae the
dil hamein samjha-bujha kar su-e-jaanan le chala

Hasan Barelvi

---

---