in ko kya kaam hai murawwat se apni ruKH se ye munh na moDenge
jaan shayad farishte chhoD bhi den doctor fees ko na chhoDenge

Akbar Allahabadi

---

---

is gulistan mein bahut kaliyan mujhe taDpa gain
kyun lagi thin shaKH mein kyun be-khile murjha gain

Akbar Allahabadi

---

---

is qadar tha khaTmalon ka chaarpai mein hujum
wasl ka dil se mere arman ruKHsat ho gaya

Akbar Allahabadi

---

---

ishq ke izhaar mein har-chand ruswai to hai
par karun kya ab tabiat aap par aai to hai

Akbar Allahabadi

---

---

ishq nazuk-mizaj hai behad
aql ka bojh uTha nahin sakta

Akbar Allahabadi

---

---

ishwa bhi hai shoKHi bhi tabassum bhi haya bhi
zalim mein aur ek baat hai is sab ke siwa bhi

Akbar Allahabadi

---

---

jab gham hua chaDha lin do botalen ikaTThi
mulla ki dauD masjid 'akbar' ki dauD bhaTTi

Akbar Allahabadi

---

---