KHwab jitne dekhne hain aaj sare dekh len
kya bharosa kal kahan pagal hawa le jaegi

Aashufta Changezi

---

---

kis ki talash hai hamein kis ke asar mein hain
jab se chale hain ghar se musalsal safar mein hain

Aashufta Changezi

---

---

na ibtida ki KHabar aur na intiha malum
idhar udhar se suna aur bas uDa lae

Aashufta Changezi

---

---

pahle hi kya kam tamashe the yahan
phir nae manzar uTha laya hun main

Aashufta Changezi

---

---

saDak pe chalte hue aankhen band rakhta hun
tere jamal ka aisa maza paDa hai mujhe

Aashufta Changezi

---

---

sabhi ko apna samajhta hun kya hua hai mujhe
bichhaD ke tujh se ajab rog lag gaya hai mujhe

Aashufta Changezi

---

---

safar to pahle bhi kitne kiye magar is bar
ye lag raha hai ki tujh ko bhi bhul jaenge

Aashufta Changezi

---

---