agar na zohra-jabinon ke darmiyan guzre
to phir ye kaise kaTe zindagi kahan guzre

Jigar Moradabadi

---

---

ahbab mujh se qat-e-talluq karen 'jigar'
ab aaftab-e-zist lab-e-baam aa gaya

Jigar Moradabadi

---

---

ai mohtasib na phenk mere mohtasib na phenk
zalim sharab hai are zalim sharab hai

Jigar Moradabadi

---

---

aisa kahan bahaar mein ranginiyon ka josh
shamil kisi ka KHun-e-tamanna zarur tha

Jigar Moradabadi

---

---

allah agar taufiq na de insan ke bas ka kaam nahin
faizan-e-mohabbat aam sahi irfan-e-mohabbat aam nahin

Jigar Moradabadi

---

---

allah-re chashm-e-yar ki mojiz-baniyan
har ek ko hai guman ki muKHatab hamin rahe

Jigar Moradabadi

---

---

apna zamana aap banate hain ahl-e-dil
hum wo nahin ki jin ko zamana bana gaya

Jigar Moradabadi

---

---