dhaare se kabhi kashti na haTi aur sidhi ghaT par aa pahunchi
sab bahte hue dariyaon ke kya do hi kinare hote hain

Arzoo Lakhnavi

---

---

dil ki zid is liye rakh li thi ki aa jae qarar
kal ye kuchh aur kahega mujhe malum na tha

Arzoo Lakhnavi

---

---

do tund hawaon par buniyaad hai tufan ki
ya tum na hasin hote ya mein na jawan hota

Arzoo Lakhnavi

---

---

dost ne dil ko toD ke naqsh-e-wafa miTa diya
samjhe the hum jise KHalil kaba usi ne Dha diya

Arzoo Lakhnavi

---

---

ek dil patthar bane aur ek dil ban jae mom
aaKHir itna farq kyun taqsim-e-ab-o-gil mein hai

Arzoo Lakhnavi

---

---

faza mahdud kab hai ai dil-e-wahshi falak kaisa
nilahaT hai nazar ki dekhte hain jo nigahon se

Arzoo Lakhnavi

---

---

hath se kis ne saghar paTka mausam ki be-kaifi par
itna barsa TuT ke baadal Dub chala mai-KHana bhi

Arzoo Lakhnavi

---

---