had se Takraati hai jo shai wo palaTti hai zarur
KHud bhi roenge gharibon ko rulane wale

Arzoo Lakhnavi

---

---

hai mohabbat aisi bandhi girah jo na ek hath se khul sake
koi ahd toDe kare dagha mera farz hai ki wafa karun

Arzoo Lakhnavi

---

---

halka tha nadamat se sarmaya ibaadat ka
ek qatre mein bah nikle tasbih ke sau dane

Arzoo Lakhnavi

---

---

hum ko itna bhi rihai ki KHushi mein nahin hosh
TuTi zanjir ki KHud panw hamara TuTa

Arzoo Lakhnavi

---

---

hamari nakaami-e-wafa ne zamane ki khol di hain aankhen
charagh kab ka bujha paDa hai magar andhera kahin nahin hai

Arzoo Lakhnavi

---

---

har ek sham kahti hai phir subh hogi
andhere mein suraj nazar aa raha hai

Arzoo Lakhnavi

---

---

har nafas ek sharab ka ho ghunT
zindagani haram hai warna

Arzoo Lakhnavi

---

---