hala kya tana dun zuhhad ko zuhd-e-riyai ka
paDhi hai main ne masjid mein namaz-e-be-wazu barson

Syed Yusuf Ali Khan Nazim

---

---

osa-e-ariz mujhe dete hue Darta hai kyun
lunga kya nok-e-zaban se tere ruKH ka til uTha

Syed Yusuf Ali Khan Nazim

---

---

chahun ki haal-e-wahshat-e-dil kuchh raqam karun
bhagen huruf waqt-e-nigarish qalam se du

Syed Yusuf Ali Khan Nazim

---

---

chale ho dasht ko 'nazim' agar mile majnun
zara hamari taraf se bhi pyar kar lena

Syed Yusuf Ali Khan Nazim

---

---

ek hai jab marja-e-islam-o-kufr
farq kaisa subha-o-zunnar ka

Syed Yusuf Ali Khan Nazim

---

---

ghar ki virani ko kya roun ki ye pahle si
tang itna hai ki gunjaish-e-tamir nahin

Syed Yusuf Ali Khan Nazim

---

---

aa gaya dhyan mein mazmun teri yaktai ka
aaj matla hua misra meri tanhai ka

Syed Yusuf Ali Khan Nazim

---

---

hai id mai-kade ko chalo dekhta hai kaun
shahd o shakar pe TuT paDe roza-dar aaj

Syed Yusuf Ali Khan Nazim

---

---

hai jalwa-faroshi ki dukan jo ye ab isi ne
diwar mein khiDki sar-e-bazar nikali

Syed Yusuf Ali Khan Nazim

---

---