sabhi zindagi pe farefta koi maut par nahin shefta
sabhi sud-KHor to ho gae hain koi paThan nahin raha

Shuja Khaavar

---

---

tangi-e-haiat se Takraata hua josh-e-mawad
shaeri ka lutf aa jata hai chhoTi bahr mein

Shuja Khaavar

---

---

'shujaa' maut se pahle zarur ji lena
ye kaam bhul na jaana baDa zaruri hai

Shuja Khaavar

---

---

'shuja' wo KHairiyat puchhen to hairat mein na paD jaana
pareshan karne wale KHair-KHwahon mein bhi hote hain

Shuja Khaavar

---

---

sardi bhi KHatm ho gai barsat bhi gai
aur is ke sath garmi-e-jazbaat bhi gai

Shuja Khaavar

---

---

saton aalam sar karne ke baad ek din ki chhuTTi le kar
ghar mein chiDiyon ke gane par bachchon ki hairani dekho

Shuja Khaavar

---

---

ind khaDe hain mimbar mimbar
aur waiz ne pi rakkhi hai

Shuja Khaavar

---

---

tanhai ka ek aur maza luT raha hun
mehman mere ghar mein bahut aae hue hain

Shuja Khaavar

---

---

sab ka hi nam lete hain ek tujh ko chhoD kar
KHasa shuur hai hamein wahshat ke bawajud

Shuja Khaavar

---

---