hum KHush hain hamein dhup wirasat mein mili hai
ajdad kahin peD bhi kuchh bo gae hote

Shahryar

---

---

aandhiyan aati thin lekin kabhi aisa na hua
KHauf ke mare juda shaKH se patta na hua

Shahryar

---

---

hai koi jo batae shab ke musafiron ko
kitna safar hua hai kitna safar raha hai

Shahryar

---

---

hai aaj ye gila ki akela hai 'shahryar'
tarsoge kal hujum mein tanhai ke liye

Shahryar

---

---

gulab Tahni se TuTa zamin par na gira
karishme tez hawa ke samajh se bahar hain

Shahryar

---

---

ghar ki tamir tasawwur hi mein ho sakti hai
apne naqshe ke mutabiq ye zamin kuchh kam hai

Shahryar

---

---

gardish-e-waqt ka kitna baDa ehsan hai ki aaj
ye zamin chand se behtar nazar aati hai hamein

Shahryar

---

---

gham ki daulat baDi mushkil se mila karti hai
saunp do hum ko agar tum se nigahbani na ho

Shahryar

---

---

ek hi miTTi se hum donon bane hain lekin
tujh mein aur mujh mein magar fasla yun kitna hai

Shahryar

---

---