'salim' ab tak kisi ko ba-dua di to nahin lekin
hamesha KHush rahe jis ne hamara dil dukhaya hai
Saleem Kausar
qurbaten hote hue bhi faslon mein qaid hain
kitni aazadi se hum apni hadon mein qaid hain
Saleem Kausar
qadmon mein sae ki tarah raunde gae hain hum
hum se ziyaada tera talabgar kaun hai
Saleem Kausar
pukarte hain unhen sahilon ke sannaTe
jo log Dub gae kashtiyan banate hue
Saleem Kausar
mujhe sambhaalne mein itni ehtiyat na kar
bikhar na jaun kahin main teri hifazat mein
Saleem Kausar
mohabbat apne liye jin ko muntaKHab kar le
wo log mar ke bhi marte nahin mohabbat mein
Saleem Kausar
meri raushni tere KHadd-o-KHal se muKHtalif to nahin magar
tu qarib aa tujhe dekh lun tu wahi hai ya koi aur hai
tho my sight unconversant with your features may not be
if or not you are the same come close and let me see,
Saleem Kausar
main ne jo likh diya wo KHud hai gawahi apni
jo nahin likkha abhi us ki bashaarat dunga
Saleem Kausar
main kisi ke dast-e-talab mein hun to kisi ke harf-e-dua mein hun
main nasib hun kisi aur ka mujhe mangta koi aur hai
I am in someone's outstretched hand, and in someone's prayer prayer I be
I am someone's destiny but someone else does ask for me
Saleem Kausar