har ek daur ka mazhab naya KHuda laya
karen to hum bhi magar kis KHuda ki baat karen
Sahir Ludhianvi
har-chand meri quwwat-e-guftar hai mahbus
KHamosh magar tab-e-KHud-ara nahin hoti
Sahir Ludhianvi
hazar barq gire lakh aandhiyan uTThen
wo phul khil ke rahenge jo khilne wale hain
Sahir Ludhianvi
ek shahanshah ne daulat ka sahaara le kar
hum gharibon ki mohabbat ka uDaya hai mazaq
Sahir Ludhianvi
is rengti hayat ka kab tak uThaen bar
bimar ab ulajhne lage hain tabib se
Sahir Ludhianvi
is tarah zindagi ne diya hai hamara sath
jaise koi nibah raha ho raqib se
Sahir Ludhianvi
jaan-e-tanha pe guzar jaen hazaron sadme
aankh se ashk rawan hon ye zaruri to nahin
countless calamities may this lonely soull befall
thse eyes shed copious tears is not a must at all
Sahir Ludhianvi
jab tum se mohabbat ki hum ne tab ja ke kahin ye raaz khula
marne ka saliqa aate hi jine ka shuur aa jata hai
Sahir Ludhianvi
jazbaat bhi hindu hote hain chahat bhi musalman hoti hai
duniya ka ishaara tha lekin samjha na ishaara dil hi to hai
Sahir Ludhianvi