meri KHushiyon se wo rishta hai tumhaara ab tak
id ho jae agar id-mubarak kah do

Nomaan Shauque

---

---

mausam-e-wajd mein ja kar main kahan raqs karun
apni duniya meri wahshat ke barabar kar de

Nomaan Shauque

---

---

main KHanqah-e-badan se udas lauT aaya
yahan bhi chahne walon mein KHak baTti hai

Nomaan Shauque

---

---

main apne sae mein baiTha tha kitni sadiyon se
tumhaari dhup ne diwar toD di meri

Nomaan Shauque

---

---

main agar tum ko mila sakta hun mahr-o-mah se
apne likkhe par siyahi bhi chhiDak sakta hun main

Nomaan Shauque

---

---

lipTa bhi ek bar to kis ehtiyat se
aaise ki sara jism moattar na ho sake

Nomaan Shauque

---

---

kuchh na tha mere pas khone ko
tum mile ho to Dar gaya hun main

Nomaan Shauque

---

---

koi samjhae mere maddah ko
taliyon se bhi bikhar sakta hun main

Nomaan Shauque

---

---

kisi ke sae kisi ki taraf lapakte hue
naha ke raushniyon mein lage bahakte hue

Nomaan Shauque

---

---