jab main ne kaha dil mera pamal kiya kyun
kis naz se bole ki mohabbat ki saza thi

Muztar Khairabadi

---

---

jab un ki pattiyan bikhrin to samjhe maslahat us ki
ye gul pahle samajhte the hawa be-kar chalti hai

Muztar Khairabadi

---

---

jagane chuTkiyan lene satane kaun aata hai
ye chhup kar KHwab mein allah jaane kaun aata hai

Muztar Khairabadi

---

---

jalega dil tumhein bazm-e-adu mein dekh kar mera
dhuan ban ban ke arman mahfil-e-dushman se niklenge

Muztar Khairabadi

---

---

jalwa-e-ruKHsar-e-saqi saghar-o-mina mein hai
chand upar hai magar Duba hua dariya mein hai

Muztar Khairabadi

---

---

janab-e-KHizr rah-e-ishq mein laDne se kya hasil
main apna rasta le lun tum apna rasta le lo

Muztar Khairabadi

---

---

jitne but hain main sab pe marta hun
mera iman ek ho to kahun

Muztar Khairabadi

---

---

jiye jate hain pasti mein tere sare jahan wale
kabhi niche bhi nazren Dal unche aasman wale

Muztar Khairabadi

---

---

jo puchha dil hamara kyun liya to naz se bole
ki thoDi be-qarari is dil-e-'muztar' se lena hai

Muztar Khairabadi

---

---