jhuTi baaton ki tajalli nazar aae aise
subh-e-kazib ki safedi phire dalanon mein

Muneer Shikohabadi

---

---

jis roz main ginta hun tere aane ki ghaDiyan
suraj ko bana deti hai sone ki ghaDi baat

Muneer Shikohabadi

---

---

kabe se mujh ko lai sawad-e-kunisht mein
islah di buton ne KHat-e-sar-nawisht mein

Muneer Shikohabadi

---

---

kab pan raqibon ko inayat nahin hote
kis roz mere qatl ka beDa nahin uThta

Muneer Shikohabadi

---

---

kabhi payam na bheja buton ne mere pas
KHuda hain kaise ki paighambar nahin rakhte

Muneer Shikohabadi

---

---

kahte hain sab dekh kar betab mera uzw uzw
aadmi ab tak nahin dekha kahin simab ka

Muneer Shikohabadi

---

---

karta raha lughat ki tahqiq umr bhar
aamal-nama nusKHa-e-farhang ho gaya

Muneer Shikohabadi

---

---

karte hain masjidon mein shikwa-e-mastaan zahid
yani aankhon ka bhawon se ye gila karte hain

Muneer Shikohabadi

---

---

KHaksaron mein nahin aisi kisi ki tauqir
qadd-e-adam meri tazim ko saya uTTha

Muneer Shikohabadi

---

---