nale hain dilsitan to phir aahen hain barchhiyan to phir
hum to KHamosh baiThe the aap ne kyun sata diya

Arzoo Lakhnavi

---

---

kis ne bhige hue baalon se ye jhaTka pani
jhum ke aai ghaTa TuT ke barsa pani

Arzoo Lakhnavi

---

---

kuchh kahte kahte ishaaron mein sharma ke kisi ka rah jaana
wo mera samajh kar kuchh ka kuchh jo kahna na tha sab kah jaana

Arzoo Lakhnavi

---

---

kuchh to mil jae lab-e-shirin se
zahr khane ki ijazat hi sahi

Arzoo Lakhnavi

---

---

lalach bhari mohabbat nazron se gir na jae
bad-e'tiqad dil ki jhuTi namaz ho ka

Arzoo Lakhnavi

---

---

masum nazar ka bhola-pan lalcha ke lubhana kya jaane
dil aap nishana banta hai wo tir chalana kya jaane

Arzoo Lakhnavi

---

---

maKHarab-e-kar hui josh mein KHud ujlat-e-kar
pichhe haT jaegi manzil mujhe malum na tha

Arzoo Lakhnavi

---

---

misal-e-shama apni aag mein kya aap jal jaun
qisas-e-KHamushi legi kahan tak ai zaban mujh se

Arzoo Lakhnavi

---

---

mohabbat nek-o-bad ko sochne de ghair-mumkin hai
baDhi jab be-KHudi phir kaun Darta hai gunahon se

Arzoo Lakhnavi

---

---