KHak hun lekin sarapa nur hai mera wajud
is zamin par chand suraj ka numainda hun main

Anwar Sadeed

---

---

aashiyanon mein na jab lauTe parinde to 'sadid'
dur tak takti rahin shaKHon mein aankhen subh tak

Anwar Sadeed

---

---

jo phul jhaD gae the jo aansu bikhar gae
KHak-e-chaman se un ka pata puchhta raha

Anwar Sadeed

---

---

jagti aankh se jo KHwab tha dekha 'anwar'
us ki tabir mujhe dil ke jalane se mili

Anwar Sadeed

---

---

hum ne har samt bichha rakkhi hain aankhen apni
jaane kis samt se aa jae sawari teri

Anwar Sadeed

---

---

ghup-andhere mein bhi us ka jism tha chandi ka shahr
chand jab nikla to wo sona nazar aaya mujhe

Anwar Sadeed

---

---

dukh ke taq pe sham Dhale
kis ne diya jalaya tha

Anwar Sadeed

---

---

dam-e-visal teri aanch is tarah aai
ki jaise aag sulagne lage gulabon mein

Anwar Sadeed

---

---

chashme ki tarah phuTa aur aap hi bah nikla
rakhta bhala main kab tak aankhon mein nihan pani

Anwar Sadeed

---

---