mila kar KHak mein bhi hae sharm un ki nahin jati
nigah nichi kiye wo samne madfan ke baiThe hain

Ameer Minai

---

---

mili hai duKHtar-e-raz laD-jhagaD ke qazi se
jihad kar ke jo aurat mile haram nahin

Ameer Minai

---

---

mera KHat us ne paDha paDh ke nama-bar se kaha
yahi jawab hai is ka koi jawab nahin

Ameer Minai

---

---

misi chhuTi hui sukhe hue honT
ye surat aur aap aate hain ghar se

Ameer Minai

---

---

muddat mein sham-e-wasl hui hai mujhe nasib
do-chaar sal tak to ilahi sahar na ho

Ameer Minai

---

---

pahle to mujhe kaha nikalo
phir bole gharib hai bula lo

Ameer Minai

---

---

nabz-e-bimar jo ai rashk-e-masiha dekhi
aaj kya aap ne jati hui duniya dekhi

Ameer Minai

---

---

nawak-e-naz se mushkil hai bachana dil ka
dard uTh uTh ke batata hai Thikana dil ka

Ameer Minai

---

---

pahlu mein mere dil ko na ai dard kar talash
muddat hui gharib watan se nikal gaya

Ameer Minai

---

---