faqat mal-o-zar-e-diwar-o-dar achchha nahin lagta
jahan bachche nahin hote wo ghar achchha nahin lagta

Abbas Tabish

---

---

aankhon tak aa saki na kabhi aansuon ki lahr
ye qafila bhi naql-e-makani mein kho gaya

Abbas Tabish

---

---

hum hain sukhe hue talab pe baiThe hue hans
jo talluq ko nibhate hue mar jate hain

Abbas Tabish

---

---

hum juDe rahte the aabaad makanon ki tarah
ab ye baaten hamein lagti hain fasanon ki tarah

Abbas Tabish

---

---

hamare jaise wahan kis shumar mein honge
ki jis qatar mein majnun ka nam aaKHiri hai

Abbas Tabish

---

---

hamein to is liye ja-e-namaz chahiye hai
ki hum wajud se bahar qayam karte hain

Abbas Tabish

---

---

hijr ko hausla aur wasl ko fursat darkar
ek mohabbat ke liye ek jawani kam hai

Abbas Tabish

---

---

ek mohabbat hi pe mauquf nahin hai 'tabish'
kuchh baDe faisle ho jate hain nadani mein

Abbas Tabish

---

---

iltijaen kar ke mangi thi mohabbat ki kasak
be-dili ne yun gham-e-nayab wapas kar diya

Abbas Tabish

---

---