shab ki shab koi na sharminda-e-ruKHsat Thahre
jaane walon ke liye shamen bujha di jaen

Abbas Tabish

---

---

nihaal-e-dard ye din tujh pe kyun utarta nahin
ye nil-kanTh kahin tujh se bad-guman hi na ho

Abbas Tabish

---

---

na KHwab hi se jagaya na intizar kiya
hum is dafa bhi chale aae chum kar us ko

Abbas Tabish

---

---

mujh se to dil bhi mohabbat mein nahin KHarch hua
tum to kahte the ki is kaam mein ghar lagta hai

Abbas Tabish

---

---

mohabbat ek dam dukh ka mudawa kar nahin deti
ye titli baiThti hai zaKHm par aahista aahista

Abbas Tabish

---

---

milti nahin hai naw to darwesh ki tarah
KHud mein utar ke par utar jaana chahiye

Abbas Tabish

---

---

mere sine se zara kan laga kar dekho
sans chalti hai ki zanjir-zani hoti hai

Abbas Tabish

---

---

mera ranj-e-mustaqil bhi jaise kam sa ho gaya
main kisi ko yaad kar ke taza-dam sa ho gaya

Abbas Tabish

---

---

mausam tumhaare sath ka jaane kidhar gaya
tum aae aur baur na aaya daraKHt pa

Abbas Tabish

---

---